ILOILO CITY- Nakitaan na sang potensyal sa patag sang weightlifting ang labing una nga Olympic gold medalist sang Pilipinas nga si Hidilyn Diaz sang 10 ka tuig pa lang ini.
Sa interview sang Bombo Radyo kay Elbert Bong Atilano, director sang Sports Association in Zamboanga City kag anay coach/trainor ni Diaz nga tumandok sang Zamboanga City, iya ginpahayag nga mga atleta man sadto ang mga pakaisahan ni Diaz kag sila ang nagdala sa iya sa gym agud maghanas.
Suno kay Atilano nga nagapangalad man subong bilang councilor sang Zamboanga City, sang nakit- an niya ang bataon pa nga si Hidilyn, nasiling niya nga nagakabagay gid sa weightlifting ang structure sang lawas sini kag gindugangan pa sang iya pagka-determinado nga nagapang-car wash ini sang jeep para lang nga may inugpliti ini pakadto sa gym.
Pahayag ni Atilano, sang nag-umpisa na sa pag-compete si Diaz sa national tubtob sa international level, didto niya nahambal nga si Hidilyn na ang ginahulat sang Pilipinas nga makadaug sang maila nga bulawan nga medalya sa Olympics.
Gintuad man sang natungdan nga bangud sa naangkon man nga mga kapaslawan sa kompetisyon sadto, nagsulod man sa pinsar ni Diaz nga mag-untat na sa weightlifting apang bangud man sa mga tawo nga nag-engganyo sa iya nga magpadayon, nagbunga ini tanan subong.
Dugang pa niya, bentaha man nga sa weightlifting nagfocus si Diaz bangud ini ang event nga budlay dayaon indi kaangay sang iban nga sports nga judges ang naga-score kag kon kaisa may nagakatabo pa nga magic.
