Dugang nga pwersa ang kinahanglanon sang team sang Pilipinas agud mahakwat ang bilog nga pungsod kag mapasaka sa ikatatlo nga puwesto sa overall medal tally sa 31st Southeast Asian (SEA) Games sa Hanoi, Vietnam.
Kritikal ang papel nga ginauyatan subong sang national weightlifters, kag isa diri ang Olympic champion nga si Hidilyn Diaz nga maga-compete na sa women’s 55-kilogram class ‘la una karon sa hapon (PST).
Heavy favorite si Diaz nga madepensahan ang SEA Games crown sa amo nga division apang indi ini mangin mahapos.
Mangin si Diaz ang nagapreparar man kun hinali nga maka-produce sang upset ang iya mga kasumpong.
Isa sa ginabantayan nga kasumpong amo si Tanasan Sanikun sang Thailand nga nakadaog sang gold sa women’s 48kg division sa 2016 Rio Olympics. Napierde na sini si Diaz sa 53kg category sang 2017 World Championships sa Anaheim, California.
Sa interview sang Bombo Radyo kay Samahang Weightlifting sa Pilipinas president Monico Puentevella, iya ginpahayag nga ‘preparado kag dugay ang practice’ ni Diaz para sa sini nga kumpetisyon nga amo ang una niya nga intrahan matapos nakakuha sang gold medal sa Tokyo Olympics.
“Pareho ni sila ni Pacquiao kag ni Jordan. Indi lang pag-hangkata, kay kun hangkaton mo, baw matilaw gid. Mga kampyeon ni sila nga indi mo dapat paghangkaton,” suno kay Puentevella.
Ginpakigbahin man ni Puentevella nga tuyo gid ni Diaz nga maka-compete pa sa isa ka Olympiada — ang Paris 2024.
“Gusto ko tani nga mapakasal na ni siya, pero matilaw gid. Indi magpasupil kay maintra pa sa Paris Olympics. Silver medal (Rio Olympics) kag Gold medal (Tokyo Olympics) na siya kag siling ko gani wala na sang tawo kag Pilipino nga makahimo sina. Budlay na na nga silver tapos gold,” suno kay Puentevella.
Target sang weightlifting team nga makakuha sang tatlo ka gold medals, apang “kun duha lang, okay na gid”, suno pa sa anay kongresista.
Sa weightlifting, yari ang iban pa nga Pinoy nga balantayan:
Si Nestor Colonia (67kg) nga maga-compete subong nga Byernes upod kay Rowel Garcia (61kg) kag Margaret Colonia (59kg).
Balantayan man si Elreen Ando (64kg) sa Sabado kag si Kristel Macrohon (+71kg) sa Domingo.
Ang Pilipinas ang reigning champion sa SEA Games apang nadagdag sa ikalima nga puwesto sa latest medal tally.
Ginalantaw sang sports officials ang weightlifting kag boxing nga amo ang makadugang sang gold medals para sa pungsod. ###
