ILOILO CITY- Nalangkag na ang mga kasimanwa sang labing- una nga Pinay Olympic gold medalist nga si Hidilyn Diaz sa iya pagpauli sa Pilipinas.
Si Diaz ang natalana nga maglupad halin sa Tokyo, Japan 4:45 subong nga hapon upod sa iya Chinese coach nga si Gao Kaiwen kag strength and conditioning coach-boyfriend nga si Julius Naranjo kag magadiretso sa ila hotel para sa mandatory seven-day quarantine.
Apang antes sila magapadulong sa hotel, i- award sang Philippine Sports Commission (PSC) ang gold medal of valor bilang kabahin sang Expanded Athletes Incentives Act nga nagalakip man sang P10 million cash incentive para sa Olympic gold medal.
Pagkatapos sang quarantine, magapauli na sa Zamboanga si Diaz kon sa diin nagahulat ang isa ka grand parade.
Sa exclusive interview sang Bombo Radyo Philippines kay Mayor Ma. Isabelle Beng Climaco sang Zamboanga City, iya ginpahayag nga apisar wala sang patigayunon nga dako nga pagtililipon apang tumanon sa gihapon ni Diaz ang tradisyon sa kada tion nga nagapauli ini pagkatapos sang iya kompetisyon.
Suno kay Climaco, halin sa airport sa Zamboanga City, magadiretso si Diaz sa City Hall, sunod sa Shrine of Our Lady of Pillar antes siya magpauli sa ilo mismo puluy- an sa Brgy. Mampang.
Nahibaluan nga isa ka tuig kag tunga man nga wala nakapauli si Diaz sa ila puluy- an bangud sa iya preparasyon para sa Olympics kag bangod man sa pandemya.
