Napaslawan ang weightlifting icon sang Pilipinas nga si Hidilyn Diaz nga maka-qualify para sa 2024 Paris Olympics matapos nga ginlutos sang isa pa ka Pinay nga si Elreen Ando sa women’s 59-kilogram category sa World Cup sa Phuket, Thailand.
Nasarangan ni Diaz ang 99kg sa snatch apang wala na nakalampas sa ikaduha kag ikatatlo nga attempt sa clean and jerk kag naka-tally lamang sang 222kg, mas manubo sa kabug-usan nga 229-kilograms nga nadala naman ni Ando.
Ang amo nga event sa Thailand amo ang katapusan nga qualifier para sa Paris Summer Games.
Pareho nga nag-compete sanday Ando kag Diaz sa women’s 59-kilogram class kun sa diin santo sa pagsulundan, isa lamang ka spot ang mahimo makuha sang kada pungsod sa kada weightlifting division.
Ang 32-anyos nga si Diaz nga bugal sang Zamboanga amo ang una kag naga-isahanon nga gold medalist sang Pilipinas sa maragtas sang Olympiada matapos ini nagpangibabaw sa 55-kg category sa Tokyo Olympics sang 2021.
Apang bangud wala na sang 55-category sa Paris Summer Games, nagtinguha ini nga magsaka sa 59kg subong nga tuig kun sa diin kun nagmadinalag-on sa iya target, ini na kuntani ang iya ikalima nga sunod-sunod nga appearance sa Olympics matapos nga nakapasakop man ini sa Olympics sa Beijing kag London antes nakuha ang silver sa Brazil kag ang gold sa Japan.
Ang mas bataon naman nga si Ando nga naga-edad pa lamang sang 25-anyos ang madugay na nga myembro man sang national team sang Pilipinas kag ini na ang iya ikaduha nga Olympic appearance matapos nagpang-pito sa 2020 Tokyo Olympics sa Women’s 64kg category.
Si Ando man ang ikaduha nga Pinoy weightlifter nga nakakuha sang ticket para sa Summer Games matapos nga nakabulsa man sang spot si John Ceniza sa men’s 61kg class.
Ipaguwa sang International Weightlifting Federation ang final kag official ranking list sa Mayo antes ang Olympiada nga magasugod sa Hulyo.
Ang iban pa nga delegates sang Pilipinas nga kuwalipikado sa Paris (as of April 3) amo sanday EJ Obiena, Carlos Yulo, Aleah Finnegan, Eumir Marcial, Nesthy Petecio, kag Aira Villegas.#
