Maga-umpisa na subong nga adlaw, Marso 11, ang high-level United States presidential trade and investment mission diri sa Pilipinas.
Pangunahan ini ni US Commerce Secretary Gina Raimondo kaupod ang 22 ka chief executives sang dalagku nga kumpaniya sa Estados Unidos sang Amerika.
Lakip sa magabisita diri sa pungsod amo ang Google Asia Pacific, United Airlines, United Parcel Service, kag Microsoft Corp.
Yara man ang President’s Export Council chairman nga si Mark Ein, kag ang CEO, US-ASEAN Business Council president nga si Ted Osius, kag Apl.de.Ap Foundation International founder nga si Allan Pineda a.k.a Apl.de.Ap.
Ini nga high-level trade mission ang kabahin sang napasalig sang Amerika sa idalom sang 123 Agreement nga pirmado nanday US President Joe Biden kag President Ferdinand ‘Bongbong’ Marcos, Jr. sang Nobyembre sang nagligad nga tuig.
Suno sa Department of Trade and Industry (DTI), ang iban sa sini nga mga kumpaniya ang yari na nga daan sa Pilipinas samtang ang iban naman ang natalana pa lamang nga mag-umpisa sang ila nga investments.
Lakip sa mga sektor nga makabenepisyo diri amo ang energy, information communications technology, kag infrastructure.
Magluwas sa trade mission, magapakigkita man si Raimondo sa Private Sector Advisory Council kag sa Philippine business organizations.#
