GUIMARAS – Tunga ang opinyon sang mga estudyante tuhoy sa ginaduso nga iseparar ang mga babayi kag lalaki nga estudyante agud nga matapna ang teen-age pregnancy sa pungsod.
Sa interview sang Bombo Radyo kay KC Faith Gadnao, Senior High School Student sang Cabalagnan National High School sa Nueva Valencia, Guimaras, iya ginpahayag nga indi kinahanglan nga iseparar ang babayi kag lalaki nga estudyante bangud nga nakadepende sa pagpahangop sang mga manunudlo kag ginikanan kun nga-a dapat likawan ang pre-marital sex.
Suno kay Gadnao, ang High School students ang yara naman sa nagaka-igo nga edad kag madali na nga makahangop sa kun ano ang husto kag ano ang sala.
Ginpahayag ni Gadnao nga ang importante nga may yara lang sang limitasyon ang tagsa ka estudyante paagi sa paggiya sang mga ginikanan.
Samtang, suno naman kay Kaye Angela Bugayong, pabor siya nga iseparar ang babayi kag lalaki nga estudyante agud nga mangin kumportable ang tagsa-tagsa.
Suno kay Bugayong, indi malikawan kun kaisa nga indi kumportable ang paggiho sang mga babayi nga estudyante kun may yara sang mga lalaki
kag amo man ang nabatyagan sang mga lalaki kun yara ang presensya sang mga babayi nga estudyante.
