Arestado sa drug buybust operation ang ginakabig nga high-value drug personality nga si alyas “Nestor”, 67 anyos, kag residente sang Zone 6, Brgy. Calumpang, Molo, Iloilo City, sang 11:55 sang udto, Hulyo 15.
Sa interview sang Bombo Radyo kay Police Lieutenant Lloyd Pagulayan, Deputy Station Commander sang Police Station 4, iya gin pahayag nga nabaklan si Nestor sang isa ka plastic sachet sang ginapatihan nga shabu sa ginpatigayon nga buybust operation sang mga otoridad.
Nakumpiskar sa iya ang suspected shabu nga may kabug-aton nga 50 ka gramos kag ginabana-bana nga may market value nga ₱340,000.
Suno kay PLt. Pagulayan nga duha ka semana ginmonitor si alyas Nestor antes ginkasa ang operasyon.
Sa ila imbestigasyon, nabutyagan nga kaliwaan ukon si Nestor mismo ang naga-dahu sang illegal drugs nga ginabaligya niya sa mga interesado nga magbakal.
May gintumod man ini nga isa ka ngalan nga posible ginakuhaan niya sang supply sang shabu kag ini ginpaidalum gilayon sa imbestigasyon sang mga kapulisan.
Sa subong, yara na sa kustodiya sang Drug Enforcement Team sang Molo Police Station 4 si Nestor kag atubangon niya ang kaso nga paglapas sa Republic Act 9165 ukon Comprehensive Dangerous Drugs Act of 2002.
