Dakop ang isa ka high-value individual ukon HVI sa buy-bust operation sang Iloilo Provincial Drug Enforcement Unit sa Brgy. Buyu-an, Tigbauan, Iloilo, kahapon nga adlaw, Agosto 21.
Ginkilala ang suspek kay alias “Jojo,” 48 anyos, kag residente sang Brgy. Siwaragan, San Joaquin, Iloilo, nga temporaryo nagapuyo sa Brgy. Parara Norte, Tigbauan, Iloilo.
Sa interview sang Bombo Radyo kay PMAJ Dadje Delima, head sang PDEU, iya ginpahayag nga ginbaligya sang suspek sa poseur-buyer ang isa ka sachet sang ginasuspetsuhan shabu nga amo ang nagresulta sa iya pagkadakop.
Narekober man sa iya ang duha ka daku nga heat-sealed plastic sachet kag isa ka knot-tied plastic sachet nga may ginasuspetsuhan shabu, lakip ang 6 mil pesos nga buy-bust money kag iban pa nga non-drug-related items.
Nagabug-at sang ginabulubanta 150 grams ang nakumpiskar nga suspected shabu, nga may estimated standard drug price nga masobra P1 million.
Ginkasa ang buybust operation kaupod ang Philippine Drug Enforcement Agency (PDEA) Region VI kag Tigbauan Municipal Police Station.
Sa subong, ara na sa kustodiya sang Tigbauan Municipal Police Station ang suspek kag natalana nga pagakasuhan sang paglapas sa Republic Act 9165 ukon Comprehensive Dangerous Drug Act of 2002.
