ILOILO CITY – Arestado ang isa ka high value individual sa ginpatigayon nga drug buy-bust operation sa Barangay San Pedro Molo, Iloilo City
Ang arestado amo si Aljon Clyde Reno, 24, residente sang Barangay Bagaygay Sara, Iloilo kag temporaryo nga nagapuyo sa banwa sang Pavia, Iloilo.
Sa interview sang Bombo Radyo kay Police Captain Val Cambel, team leader sang Iloilo City Drug Enforcement Unit, iya ginpahayag nga duha na ka semana nga gina-monitor ang subject.
Suno kay Cambel, narekober sa durugista ang P7,000 nga drug buy-bust money kag pito ka sachet sang suspected shabu nga nagabug-at sang 20 gramos nga may standard drug price nga P136,000
Ginpahayag dugang sa natungdan nga naghalin sa distrito sang Jaro ang ginakuhaan sang droga ni Reno.
Sa subong, yara na sa paghinakop sang Molo Police Station ang durugista kag magapangatubang sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
