La Paz, Iloilo City – Dakop sa ginpatigayon nga drug buy-bust operation ang isa ka high value individual sa Barangay Nabitasan, La Paz, Iloilo City.
Ang durugista amo si Anjo Abello alyas “Part”, 26, kag residente sang Zone 1, Barangay Rizal, La Paz, Iloilo City.
Narekober kay Abello ang 26 tanan nga sachet sang suspected shabu nga ginabanta nagabalor sang P918,000 kag nakuha man ang P20,000 nga buy-bust money.
Sa interview sang Bombo Radyo kay Punong Barangay Chichi Narandan sang Barangay Rizal, La Paz, Iloilo City, iya ginpahayag nga indi ini ang una nga bes nga napreso si Abello bangud naangot man ini sa kaangay man nga kaso sang 2020.
Suno kay Narandan, ginakahangaw-an niya ang natabo kay Abello bangud maski ang iya asawa ang nagpanugid sa iya opisina nga liwat na naman nagagamit sang droga si Abello.
Sa subong, ara na sa kamot sang mga kapulisan si Abello kag magaatubang sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
