ILOILO CITY – Nakuhaan sang halos tunga sa milyon nga balor sang iligal nga droga ang isa ka high-value individual sa drug buy-bust operation sa Barangay North San Jose, Molo, Iloilo City.
Ang arestado amo si Sanny Aragonis, 40, residente sang Zone 6, Barangay Calumpang, Molo, Iloilo City kag temporaryo nga nagapuyo sa nasambit nga barangay.
Nakuha sa iya ang ginapatihan shabu nga nagabug-at sang ginabanta 60 grams kag may standard drug price nga P408, 000.
Nakuha dugang sa iya possession ang .38 caliber revolver kag mga bala.
Sa interview sang Bombo Radyo kay Police Lieutenant Colonel Antonio Benitez, Jr., pinuno sang Iloilo City Police Office- City Drug Enforcement Unit, iya ginpahayag nga ginpatigayon ang operasyon kasunod sang nabaton nga impormasyon nagikan sa wala nagpakilala nga informant.
Dugang pa ni Benitez, padayon pa nga ginatumod kun sa diin ginakuha ni Aragonis ang kontrabando samtang nagalumpat-lumpat ini sang lugar nga ginabaligyaan sang droga.
Sa subong, preso na si Aragonis kag magapangatubang sang kaso nga paglapas sang Republic Act 9165 ukon Comprehensive Dangerous Drugs Act of 2002.
