Nadakpan ang ginakabig high-value individual sa ginpatigayon nga drug buy-bust operation sa Zone 3, Barangay Barrio Obrero, Iloilo City, kahapon sang aga, Hunyo 25.
Ginkilala ang suspek nga si ”Alyas Vinzon” 65-anyos kag residente sang nasambit nga lugar.
Sa interview sang Bombo Radyo kay Police Captain Tonigrace Troncoso, Officer-in-charge sang Iloilo City Police Station 8, iya ginpahayag nga napilitan nga gub-on sang mga operatiba sang SWAT Team ang pwertahan sang balay matapos nga wala ini gilayon mabuksan samtang nagaserbe ang mga ini sang warrant arrest.
Sang pagsulod sang mga awtoridad sa balay sang subject, apat ka indibidwal ang yara sa sulod lakip na ang asawa ni Vinzon, bata sini nga lalaki, kag iya apo.
Narekober man sa operasyon ang ginapatihan 60 grams sang suspected shabu nga may standard drug price nga P408,000.
Suno pa kay Troncoso, kilala si Vinzon nga parokyano sang mga drug user kag may ara sang transaksyon sa nagkalain-lain nga bahin sang syudad sang Iloilo.
Nahibaluan nga na aresto man si alyas Vinzon sa ginpatigayon nga drug buy bust operation sang tuig 2024.
Pahayag pa ni Troncoso magluwas sa kaso sini sang 2024 nalapas man sini ang Republic Act 10591 ukon ang Comprehensive Firearms and Ammunition Regulation Act sang tuig 2025.
Sa karon, yara na sa kustodiya sang kapulisan si Vinzon kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
