ILOILO CITY – Dakop ang ginakabig nga high value individual sa ginpatigayon nga drug buy-bust operation sa Barangay Sinikway, Lapuz, Iloilo City.
Ang arestado amo si Terence John Valdez, 43, kag residente sang Barangay Don Esteban, Lapuz, Iloilo City, apang temporaryo nga nagatinir sa Block 10, Barangay Sinikway, Lapuz, Iloilo City.
Sa interview sang Bombo Radyo kay Police Captain Val Cambel, team leader sang Iloilo City Drug Enforcement Unit, iya ginpahayag nga nakuha kay Valdez ang anum tanan ka sachet sang suspected shabu nga nagabug-at sang 18 ka gramos nga may standard drug price nga P122, 400.
Suno kay Cambel, magluwas sa iligal nga droga, nakuha man sa suspek ang mga drug paraphernalias kag buy-bust money nga nagdangat sa P7,000.
Ginpahayag sang natungdan nga nakaagi na preso si Valdez sang 2014 may kaangtanan man sa iligal nga droga kag nakagwa sang 2021.
Sa subong, balik presuhan na si Valdez sa La Paz Police Station kag magaatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
