Pat-od nga mas magataas pa ang tensyon sa tunga sang Pilipinas kag China matapos matukiban nga ginahaboy lang sang mga naka-angkla nga barko sang China ang human waste sa dagat nga sakop sang West Philippine Sea.
Suno kay Li Derr, US-based expert, founder kag Chief Executive Officer sang Simularity, eksperto sa geospatial analysis kag nagahatag sang satellite data imagery, nagatuga sang pagkaguba sa dunang-manggad sa baybayon ang ginahimo sang mga Chinese.
Pahayag pa niya, adlaw-adlaw ginahaboy sang mga Chinese vessels ang ila nga higko sa baybayon.
Bangud sa polusyon nga tuga sang ginahaboy nga higko, lakip na ang human waste, nagakaangkon na ang dagat sang Chlorophyll-a.
Sa satellite images sa nakaligad nga mga tinuig, ginpahayag ni Derr nga ang mga higko halin sa mga barko sang China ang nagtuga sang madamol nga Chlorophyll-a nga ginatunaan sang reef damage sa diin makarecover lamang ini magligad ang pila ka dekada apisar nga may yara pa sang ginahimo nga active mitigation.
As of June 17, nagdangat sa 236 ka mga barko sang China ang nakit-an sa Union Banks ukon Pagkakaisa Reefs nga kabahin man sang West Philippine Sea .
Ang pagkaguba sang dunang-manggad sa baybayon pahayag pa sang eksperto ang nagdugang lang sa mga ginahimo sang China nga pagpangguba sa baybayon lakip na ang pagkuha sa mga endangered giant claims kag pagpatukod sang artificial island building.
