ILOILO CITY – Ginpasiguro sang gobyerno nga sabton ang gasto sang mga miyembro sang pamilya Demafelis nga magapadulong sa Kuwait, kag updan man ang mga ini.
Ini kun kinahanglan na nga magtestigo ang himata ni Joanna Daniela Demafelis, ang Ilongga OFW nga ginpatay sang iya amo sa Kuwait kag ginsulod sa freezer.
Sa interview sang Bombo Radyo Iloilo, ginpahayag ni Labor Secretary Silvestre Bello III nga posible kinahanglan magtestigo sa Kuwait ang mga himata ni Demafelis bangud lakip sa mga kaso nga ginpasaka batok sa mga suspek nga sanday Nader Essam Assaf kag Mona Hassoun ang civil liability.
Samtang, ginahibalo pa suno kay Bello kun rehistrado ang Mt. Carmel Agency nga amo ang nag-recruit kay Demafelis.
Kun mapamatud-an nga indi ang mga ini rehistrado, makabig ang mga ini nga illegal recruiter kag kinahanglan nga manabat.