Indi matakos ang kalipay sang pamilya sang Ilonggo seafarer matapos nga isa ini sa 17 ka mga Pinoy nga ginhilway matapos gin-hijack sang Houthi rebels ang ila ginasakyan nga barko.
Una na gin-anunsyo sang rebelde nga Houthis nga ginhilway na nila ang crew sang commercial vessel nga Galaxy Leader nga ila gin-hijack sang Nobyembre 2023.
Sa interview sang Bombo Radyo kay Mary Jane Benigay, iya ginpahayag nga sa Bombo Radyo nila nabatian ang balita nga ginhilway na sang mga rebelde ang ila utod nga si Leonardo Junjun Flores sang Pagsangaan, Pavia, Iloilo.
Suno kay Benigay, kaangay nga nagabutan sang tunok ang bug-os nga pamilya nga makapauli ini nga buhi.
Ginsaysay niya nga humalin sang nakumpirma sadto nga isa ang iya utod sa mga seafarers nga ginkidnap, gintugyan na nila sa Diyos ang kahimtangan sang ila utod.
Pahayag niya, wala gid sila napaslawan bangud paagi sa ila pagpangamuyo kag pagtuo, wala gid ginpabay-an sang Mahal nga Makaako ang nasambit nga seafarer.
Sa subong, wala pa sang update kun san-o makapauli sa Pilipinas ang iya utod.
Matandaan nga halin sang nag-ibwal ang giyera sa Gaza, ang Galaxy Leader amo ang isa sa una nga mga barko nga gin-atake sang Houthis sa southern Red Sea nga amo ang mayor nga alagyan sang trade sa tunga sang Asya kag Europa.
Suno kay Houthi leader Abdulmalik Al Houthi, siya ang nagmandu nga pagguwaon na ang seafarers.
Ginpahayag nga gintugyan na sila sa Omani officials.
25 ang miyembro sang crew sang barko lakip ang 17 Filipinos, tatlo ka Ukrainians, duha ka Mexicans, duha ka Bulgarians kag isa ka Romanian.
