ILOILO CITY – Arestado ang hinablos sang anay drug personality nga si Melvin Odicta sa ginpatigayon nga drug buy bust operation sa Jaro Plaza sa syudad sang Iloilo.
Ang ginapahayag nga durugista amo si Rocky Odicta, 38 anyos, residente sang Barangay Tanza Esperanza, Iloilo City Proper.
Nakuha sa possession ni Odicta ang isa ka sachet sang supected shabu nga nagabalor sang P25, 000; kag sang gin-usisa dugang sang mga pulis, na-recover pa gid ang apat ka sachets sang supected shabu nga ginabanta may market value nga P102,000.
Sa interview sang Bombo Radyo kay Odicta, iya ginpahayag nga nagpakigkita lang sya kuntani sa iya nga customer para sa iya nga negosyo sa kalo.
Suno kay Odicta, gulpi lang siya gindumog sang ginabanta 5-6 ka lalaki kag ginsudlan sang sachets kag kwarta ang iya nga bulsa.
Hugot ang panindugan ni Odicta nga planted ang recoveries.
Suno kay Odicta, matinlo ang iya record sa ila barangay kag handa siya nga atubangon ang kaso nga ipasaka batok sa iya.
Samtang, daku naman nga accomplishment para sa Philippine Drug Enforcement Agency ang pagkadakup kay Odicta.
Suno kay Jeanette Reyes, agent sang Philippine Drug Enforcement Agency Region VI, yara si Odicta sa Top Ten priority target sang PDEA sa syudad sang Iloilo.
Ginapahayag nga may kahilabtanan man anay ang nadakpan sa iligal nga mga drug operations sang iya tiyo nga si Melvin Odicta.
