Nanindugan si Vice President Sara Duterte nga indi siya mag-resign apisar sang suhestyon sang pila ka mga mamalidha nga maghalin na lang siya sa pwesto bangud wala man sini personal nga gindepensahan ang 2025 budget sang iya opisina.
Ang sabat ni Sara ang kasunod sang pahayag ni Ako Bicol party-list Rep. Raul Angelo Bongalon nga daw wala man siya sang gana sa iya mga katungdanan bilang Vice President gani nga mas maayo kun magpanaog na lang ini sa posisyon.
As of press time, wala sang pormal nga panawagan sa resignation ni Sara magluwas lang sa masami paghinambit sini sang “Young Guns” ukon ang grupo sang mga bataon pa nga mga kongresista nga edad 40-anyos panubo nga ang iban first termers pa lamang sa Kamara.
Suno kay Sara, indi niya obligasyon nga sabton ang Young Guns kundi ang 32-milyones nga mga Pilipino nga nagboto sa iya.
“Hindi ako sasagot sa ‘Young Guns’ dahil kailangan ko sumagot sa 32 million na bumoto sa akin. Hindi sa isa o dalawang tao. Hindi ako aalis dito dahil nilagay ako ng mga tao dito believing I will work for the country,” pahayag sini sa isa ka press conference.
“Sa tingin ko sa nangyayari wala silang kaso sa impeachment kaya sila hanap ng hanap sa kung ano gagamitin nila… Gumawa sila ng isa pang track na resignation,” suno kay Sara. “They are trying to make a case for impeachment… dahil wala silang ebidensya, nagfi-fishing sila sa mga tanong sa loob.”
Ini nga development ang kasunod sang pag-reschedule sang Kamara sang plenary deliberations sa budget sang Office of the Vice President sa paglaum nga magatuhaw na si Sara, apang wala ini nagpakita kag nagpahayag nga sa budget deliberations sang Senado lamang siya magakadto.
Una na nga ginbuyagyag ni Sara nga nagaplano ang pila ka mga kongresista nga i-impeach siya para nga maguba ang iya posible nga presidential bid sa 2028 elections.#
