Nagakabalaka si Vice President Leni Robredo sa pahayag sang pila ka mga opisyal sang gobyerno nga nakulbaan nga ipakigbato ang kinamatarong sang Pilipinas sa teritoryo nga gina-agaw sang China.
Suno kay Robredo, wala man nagapangita sang away ang pungsod sa baylo ginapakigbato lang sang mga Filipino ang kinamatarong sang Pilipinas.
Ang nangin pahayag sang bise president ang kasunod sang pag-ako ni Department of Defense Secretary Delfin Lorenzana sa kabangdanan kun ngaa indi liwat mag-upod ang Pilipinas sa naval drills sa South China Sea.
Suno sa tiglikom, magluwas sa wala sang bastante nga gamit ang pungsod nga mag-intra sa aktibidad, may yara pa sang paandam ang China.
Pahayag pa niya, ginabantayan sang China ang hulag sang pungsod kag madamo sang sarang nga mahimo ang Chinese government kun sila ang awayon.
Nahibaluan nga sang tinalikdan nga tuig, wala man ang Pilipinas nag-upod sa naval drills.
Sabat naman ni Robredo, obligasyon sang gobyerno nga protektahan ang mga pumuluyo sa pamaagi nga indi makompromiso ang kinamatarong sa ginapanag-iyahan nga teritoryo.
Masubo pahayag sang bise presidente nga indi na lang basta-basta maghulag ang gobyerno bangud sa sa kakulba nga ginabantayan sang China ang hulag sang Pilipinas.
Magluwas kay Lorenzana, una na nga gin-ako ni Presidente Rodrigo Duterte nga indi niya masarangan nga magisog batuk sa China.
Suno kay Pres. Duterte, ginalikawan niya ang ano man nga komprontasyon sa China nga mahimo mangin tunaan sang isa ka butang nga mabudlay atubangon.
Matandaan nga nagdaog ang Pilipinas sa territorial dispute batuk sa China matapos ginkilala sang UN Permanent Court of Arbitration ang soberanyo sang estado sa West Philippine Sea.
