Ginsabat sang Malacañang ang mga pagpang-atake ni Vice President Sara Duterte batok kay President Ferdinand Marcos Jr. kadungan sang Miting de Avance sang senatorial candidates sang PDP-Laban.
Lakip sa napang-mensyonar ni Sara sa iya speech amo ang kunsekwensya sang pagpili sang sala nga lider para sa pungsod.
Pahayag ni Sara, nag-eleher ang Pilipinas sang tawo nga indi makahangop sang adlaw-adlaw nga pangabuhi sang mga Pilipino kag indi man makasarang sa paghimo sang desisyon para sa ikaayo sang mga pumuluyo.
“Pinagbabayaran natin ngayon ang pagpili ng maling lider,” suno kay Sara. Dugang niya: “In the past months, my name and my family’s name have been dragged through the mud. I have repeatedly said this before, and I will say it again now—I am not the problem of this country.”
Sabat naman ni Palace Press Officer Claire Castro, daw kaangay nga ang ginatumod ni Sara nga sala nga lider amo man ang iya kaugalingon kag ang iya pamilya.
Partikular nga gintudlo ni Castro ang tion nga nangin tiglikom si Sara sang DepEd kun sa diin 1.5 million DepEd laptops ang ginpangtago sa warehouses halin sang 2020. Suno sa undersecretary, wala man gihapon napangitaan sang paagi ni Sara ang amo nga problema sang siya ang secretary.
Pahayag pa ni Castro, sang si Sara ang yara sa DepEd, P5.7 billion ang napan-os nga gatas kag halos napan-os naman ang mga Nutribun nga nabenepisyuhan pa kuntani sang public school students kun napanagtag.
“So, at that time, nakikita natin kung papaano nga ba napabayaan ang education sector dahil 1.5 million DepEd laptops stuck in warehouses since 2020 at hindi pa niya ito nagawan ng paraan bilang namumuno sa DepEd noon,” suno sa opisyal.
“At mayroon din pong nabisto or agarang nasolusyunan ni Education Secretary Sonny Angara patungkol po doon sa ghost students na may halaga pong na-recover na P65 million,” pahayag pa niya. “So, hindi po ba siya ang problema ng bansa o isa sa mga problema ng bansa?”
