Magapatigayon sang emergency meeting ang Department of Public Works and Highways (DPWH) Region 6 sa traffic authorities sa Iloilo City kag Pavia subong nga adlaw, Disyembre 19, agud hambalan ang ginaduso nga pagpalawig sang oras sang pagbukas sang Ungka Flyover para sa mga motorista.
Sa interview sang Bombo Radyo kay Iloilo Second District Rep. Michael Gorriceta, iya ginpahayag nga gin-feedback sini kay DPWH Region officer-in-charge Engineer Sanny Boy Oropel nga indi na gid masarangan ang pagpug-ok sang trapiko sa amo nga lugar ilabi na subong nga holidays.
Humalin sang ginbuksan sa light vehicles ang inner lanes sang Ungka flyover sang Septyembre 22, ginapasugtan ang paglabay sang sini nga mga salakyan halin 6 a.m. tubtub 9 a.m. kag halin naman 4 p.m. tubtub 8 p.m. halin Lunes tubtub sa Sabado.
Sa idalom sang mga nauna nga kondisyon, ang four-wheeled vehicles lamang kaangay sang traditional jeepneys, modernized units kag private vehicles ang makalabay sa flyover samtang indi naman pwede ang mga motorsiklo, bisekleta kag traysikol.
Suno kay Gorriceta, ginaduso nga maghatag sang konsiderasyon nga palawigon ang window time: halimbawa, himuon 6:00 a.m. tubtub 10:00 a.m. ukon 2:00 p.m. -9:00 p.m. ukon mas malawig pa.
Una naman nga nagpadala sang sulat ang kongresista sa opisina ni Oropel nga nagahingyo nga bilog nga adlaw gid nga buksan ang flyover ilabi na subong nga holiday season tubtub sa Enero 2024 nga tyempo naman sang Dinagyang Festival.#
