Ginpostpone sang pila ka mga konsehal sa Iloilo City Council ang ginhingyo sang Eastport Engkwentro Live Corporation nga resolution of no objection (RONO) sa pagpacover sang online bulang sa syudad sang Iloilo.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Rules, Ordinances, Resolution, Style, Justice and Legal Affairs sang Sangguniang Panlungsod, iya ginpahayag nga luyag anay nga tun-an sang mai-id sang pila ka mga konsehal ang RONO nga ginahingyo sang nasambit nga korporasyon.
Suno kay Duron, kun siya lang ang masunod, handa siya nga pasugtan ang hingyo sang korporasyon bangud resolution lamang ang ginahingyo sang mga ini nga kinahanglanon sa pag-apply sang prangkisa sa Philippine Amusement and Gaming Corporation (PAGCOR) agud makacover sila sang online bulang.
Daw kaangay lamang suno kay Duron nga macover sang kasal, bunyag kag iban pa nga aktibidad ang korporasyon gani wala siya sang may nakita nga dapat i-object diri.
