ILOILO CITY – Naghingyo ang Iloilo City Police Office sa Sangguniang Panglunsod nga magpasar sang resolusyon agud nga magpatuman sang gun ban sa tion nga may ginapatigayon nga major event sa syudad sang Iloilo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga wala pa siya sang may nabaton nga kopya kun bala aprobado na ukon indi ang iya request.
Suno kay Defensor, mas makapaayo nga may yara sang gun ban sa tion nga may yara sang ginapatuman nga aktibidad agud nga malikawan ang kinagamo.
Ginpahayag ni Defensor nga santo request, ang gun ban ang ipatuman, isa ka semana antes kag isa ka adlaw matapos ang aktibidad.
Samtang, suno naman kay Iloilo City Councilor Eduardo Peñaredondo, aprobado na ang nasambit nga hingyo sang Iloilo City Police Office.
Ugaling lang suno kay Peñaredondo, sa baylo nga isa ka semana, ginhimu na lang ini nga duha ka adlaw antes kag isa ka adlaw matapos ang aktibidad.
Ginpahayag ni Peñaredondo nga praktikalidad lamang ang rason sa pag-ilis sang gun ban duration bangud nga tuman ka lawig ang isa ka semana.
