ILOILO CITY- Gin-athag sang Department of the Interior and Local Government nga indi sa gihapon makasulod sa Rehiyon 6 ang mga nagabyahe gikan sa National Capital Region (NCR) Bulacan, Cavite, Laguna, kag Rizal nga lunsay ginpaidalom sa General Community Quarantine (GCQ) kasunod sang narekord nga mataas ng mga kaso sang COVID-19 sa amo nga mga lugar.
Ini sa pihak sang pagbasura sang National Inter-Agency Task Force sa hingyo sang Iloilo City kag Iloilo Provincial Government nga moratorium para sa mga flights kag trips gikan sa apektado nga mga areas tubtob sa Abril 10.
Sa interview sang Bombo Radyo kay DILG Undersecretary Epimaco Densing III, iya ginpahayag nga santo sa IATF Resolution 104, indi pagtugutan ang byahe gikan sa NCR, Bulacan, Cavite, Laguna, kag Rizal magluwas lang sa mga essential travels nga epektibo tubtob sa Abril 4.
Suno kay Densing, nagakahulugan ini nga ang mga pumuluyo sa nasambit nga mga lugar ang indi man makapauli sa mga probinsya kadungan sang pag-obserbar sang Semana Santa nga magasugod sa Marso 28.
Matandaan nga antes ginbasura ang nasambit nga moratorium nga ginhingyo sang syudad kag probinsya, una na nga gin-aprubahan sang IATF ang hingyo nga uniform protocol sa tanan nga syudad kag probinsya sa Western Visayas nga amo ang pag-require sang negative reverse transcription polymerase chain reaction (RT-PCR) test result nga kinahanglan i-secure sa sulod sang 72 oras antes ang petsa sang byahe pasulod sa Rehiyon 6.
