Nakahimo sang maragtas si Alex Eala bilang labing-una nga Filipino nga nakakuha sang titulo sa Women’s Tennis Association (WTA).
Isa ka daku nga comeback ang ginhimo sang 20-anyos nga Pinay player sang ginlutos sini si Panna Udvardy sang Hungary sa final game, 1-6, 7-5, 6-3, sa Guadalajara 125 Open sa Mexico.
Natapos ang hampang pasado alas kuwatro kaina sang kaagahon oras diri sa Pilipinas.
Nagapang-75 si Eala sa world ranking samtang ang iya naman nga ginlutos nga player ang nagapang-134.
Ini nga kadalag-an amo man ang una nga singles title ni Eala subong nga tuig matapos sini nadag-an ang Open Araba en Femenino sa Espanya sang Hulyo 2024. Sang Hunyo, nagkabos si Eala kag nangin runner-up sa Eastbourne Open sang nakatapak siya sa labing-una nga tion sa WTA-level finals.
Antes sa Guadalajara 125 Open, naghampang si Eala sa main draw sang US Open kun sa diin nakalab-ot siya sa second round.
Sunod siya nga magapasakop sa Sao Paolo Open sa Brazil.
