Labi pa nga nagluya ang balor sang Philippine peso batok sa US dollar sang nagtakop sa P59 ang bayluhanay sang local unit kahapon, Nobyembre 21.
Ini ang lowest kag weakest level sang local currency batok sa US dollar halin sang Oktubre 17, 2022.
Ini nga depreciation ang kasunod sang pagbaskog sang US dollar batok sa kadam-an nga global currencies bangud ginasiling sang analysts nga indi na magpatigayon ang US Federal Reserve sang interest rate cut sa masunod nga bulan.
May economists man nga nagaangot sini nga movement sa geopolitical risks matapos ang strike sang Ukraine sa Russia gamit ang US-supplied missiles.
Gin-angot man ini sa gina-antisipar nga seasonal increase kag conversion sa pesos para sa OFW (overseas Filipino workers) remittances agud nga ma-finance ang holiday- ukon Christmas-related spending sa masunod nga bulan.
Nagpaandam man ang analysts nga kun magpadayon sa pagluya ang balor sang peso, maapektuhan sini ang inflation bangud naga-import ang Pilipinas sang mga produkto nga ginabayaran sa dolyar.
Una na nga ginsiling sang Bangko Sentral ng Pilipinas (BSP) nga gina-monitor sini ang movement sang peso batok sa dollar, apang wala gid sini ginakahangaw-an ang depreciation bangud ginapabay-an lang sini nga diktahan sang market ang movement.
