Nakahimo sang maragtas ang Philippine men’s national football team matapos ginlutos ang seven-time champion kag Southeast Asian powerhouse nga Thailand sa imbukada nga hampang sa semifinals sang 2024 ASEAN Championship, 2-1.
Sa atubang sang Filipino football fans sa Rizal Memorial Stadium sa Manila ginpatigayon ang hampang subong nga gab-i, Disyembre 27, nga amo ang nagamarka sang una nga kadalag-an sang national booters batok sa Thailand sa sulod sang masobra 50 ka tuig.
Sa 21st minute sang football match, si Sandro Reyes ang naka-una skor para sa Pilipinas kag ginpasundan ni Kike Linares sang game-winning header sa stoppage time.
Kinahanglan ipabilin sang Pilipinas ang skor kag lutuson liwat ang powerhouse team sa second leg sa Rajamangala National Stadium sa Bangkok para nga maka-abante sa labing-una nga tion sa finals sang tournament.
Nahibaluan nga ini ang una nga pagtapak sang mga Pinoy sa semifinals halin sang 2018.
Naghampang man ini subong nga gab-i nga wala ang team captain nga si Amani Aguinaldo bangud sa natipon nga yellow cards sa group stage. Wala man si vice-captain Patrick Reichelt nga nag-anunsyo sang iya pag-retiro na sa national team sang nagligad lamang nga adlaw agud mas pasulabihon ang iya pamilya.
Antes ang resulta subong nga gab-i, 21-match winless streak ang ginsuprer sang Pilipinas batok sa Thais.
Sa nagligad nga lima ka beses nila nga pag-atubangay sa regional tournaments, isa ka tion lamang nga halos nagpalapit ang Pilipinas sa Thailand nga amo ang 1-1 draw sa 2018 AFF Suzuki Cup.
