𝗜𝗟𝗢𝗜𝗟𝗢 — Amat-amat na nga nagabalik ang hog industry sa Iloilo matapos ang pila ka tuig nga pagpanghangkat sa probinsya sang African swine fever (ASF).
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga 71.6% nga nagtaas ang sufficiency level sa probinsya kag kon tayuyon lang magtaas ang swine inventory, positibo ang talatapan nga malab-ot ang 100% nga sufficiency level.
Suno kay Tabuada, yara lang sa 36.37% ang sufficiency level sa probinsya sang kasagsagan sang African swine fever (ASF).
Ginpahayag man sini nga sa subong, may 15 na ka mga banwa ang nag-upgrade halin sa red zone to pink zone, apang may 13 pa ka mga banwa ang yara sa gihapon sa red zone ukon ang may yara sang confirmed cases sang ASF.
Santo sa data sang Iloilo Veterinarian Office, may kapin 100,000 na ka mga swine inventory sa probinsya, isa man ka rason kon ngaa nagtaas ang sufficiency level sang mga baboy.
Nagpasalig naman ang talatapan nga gina-process na ang mga dokumento sang 14 ka mga banwa agud nga mapaidalum sa sentineling, kon sa diin, target ang 836 ka mga farmers nga mangin benepisyaryo sang programa kag magabaton sang tig-duha ka mga piglets.
Nagpanawagan naman ang Veterinarian Office sa mga munisipyo nga magpasa sang mga dokumento nga kinahanglanon agud nga mahatagan na sila sang pondo kag mabuligan ang mga naapektohan nga farmers.
Nahibaluan nga luyag man sang talatapan nga mapasangkad ang farm bio security measures sa probinsya agud nga magapadayon ang pagbalik sang industriya sang baboy.
Gin-athag man sang Veterinarian Office nga yara sa gihapon ang ASF rason nga kinahanglan nga pabaskugon pa farm bio security measures.
