ILOILO CITY- Wala ginadula sang Philippine National Police (PNP) ang posibilidad nga ‘hold-up me’ ang natabo sa Western Union Money Remittance Center sa Poblacion Centro, Calinog, Iloilo.
Nakuha sang duha ka mga suspek ang P1.5M sa remittance center kon sa diin isa lang ka empleyado ang nagaduty sang amo nga tion kag nalipong sang duha ka oras matapos ginpahaklo sang mga suspek sang kemikal nga pampatulog.
Sa interview sang Bombo Radyo kay PCol. Gilbert Gorero, director sang Iloilo Police Provincial Office (IPPO), iya ginpahayag nga sa subong, padayon pa ang ila pag-usoy sa mga nagkalain-lain nga anggulo sa krimen.
Suno kay Gorero, may ginauyatan naman ang otoridad nga mga testigo nga nakakilala sa isa sa mga suspek nga nagsulod sa remittance center apang wala natumod kon ang ginatumod nga suspek amo ang nangin look- out ukon amo ang nangamot gid sa holdup.
Una na nga ginpahayag ni Police Major Dadje de Lima, hepe sang Calinog Municipal Police Station, nga indi pa masapubliko ang mga pangalan sang mga suspek bangud ginapaidalom pa ini sa verification.
Ang duha ka mga suspek dugang ang may rekord na sadto sang pagpangawat kag holdup sa probinsya sang Iloilo apang indi ang mga ini residente sang Calinog.
Nahibaluan nga wala sang may nakuha nga closed circuit television (CCTV) footage sa lugar bangud nga blackout sang natabo ang pagpanghold-up.
