Pagpanghold-up ang ginalantaw rason sang Iloilo City Police Station 1 sa pagluthang patay sa lalaki sa Iznart St., Iloilo City Proper.
Ang biktima ang isa ka Chinese national, negosyante kag ginpa-iway na lang nga isapubliko sang pulis ang pangalan sini para sa seguridad sang iya nga pamilya.
Padulong na kuntani ang biktima sa iya ginatiniran nga boarding house sa Barangay Maria Clara, Iloilo City sang natabo ang krimen.
Sa interview sang Bombo Radyo kay Police Major Francisco Paguia, hepe sang Iloilo City Police Station 1, iya ginpahayag nga may yara sang bitbit nga sling bag ang biktima kag mahimo nga ini ang ginkuha sang duha ka mga suspek bangud wala na ini sang nakit-an nga nagahamyangon ang lalaki.
Suno kay Paguia, nakit-an sa Closed Circuit Television (CCTV) footage ang isa ka menor de edad kag ini ang natigayon nga nadakpan sang kapulisan.
Gin-ako man mismo sang 14-anyos nga solterito nga isa siya sa mga suspek apang ang isa niya nga kaupod amo gid pahayag niya ang nangamot kag nagtiro sa Chinese national.
Ang isa ka suspek nga upod sang menor de edad ang padayon nga ginapangita sang kapulisan.
