ILOILO CITY – Isa ka pure blooded Ilonggo ang naghimo sang pangalan sa paghimo sang pelikula, indi lang sa Pilipinas kundi mangin sa Estados Unidos.
Ini amo si Francis Lara Ho, tumandok sang Duenas, Iloilo sa diin ang iloy sini ang isa ka manunudlo kag ang amay naman sini ang anay bise alkalde sang nasambit nga banwa.
Sa interview sang Bombo Radyo kay Ho, iya ginpahayag nga antes ini nagsulod sa paghimo sang pelikula, nangin negosyante anay ini sa Amerika matapos nag-migrate sang 2003 sa diin ginkilala man ini bilang isa sa mga top entrepreneurs sang Forbes Magazine sang Nobyembre 2013 kag Fortune Magazine sang Hulyo 2016.
Nagretiro naman ini sang 2017 sa diin nagpadulong ini sa Palawan kaupod ang iya pamilya.
Apang sang 2018, ginpatukod sini ang Inspire Studios sa California, USA sa diin ang katuyuan sini amo ang makakuha sang pinakauna nga Oscars ukon Academy Awards para sa Pilipinas.
Sa subong, ang Inspire Studios ang may yara na sang apat ka pioneering movies nga ginalakipan sang Freedom Fighters, Palawan: Last Man Out, The Rescue, kag Open Doors.
Ang pinakaulihi naman sini nga pelikula amo ang historical film nga ‘1521’ sa diin ginpakita diri ang Battle of Mactan nga ginabidahan sang Pinay actresses nga sanday Bea Alonzo kag Maricel Laxa-Pangilinan, renowned American actor Danny Trejo kag Puerto Rican actor nga si Hector David Jr.
Sa maabot nga Hunyo 5, 2024, ipagwa naman sa Iloilo City ang 1521′.
