Napatay na sa edad nga 89 ang retired actor turned director nga si Robert Redford.
Suno kay Cindi Berger, CEO sang publicity firm nga Rogers & Cowan PMK, ginbawian sang kabuhi ang Hollywood legend sa ila puluy-an sa Sundance, Utah, Estados Unidos sang Amerika.
Wala gintumod ni Berger ang rason sang kamatayon sang entertainment icon.
Pagkatapos nga magsikat sang 1960s, isa si Redford sa ginatangla sang 1970s bangud sa mga pelikula nga “The Candidate,” “All the President’s Men” kag “The Way We Were.”
Natapos niya ang amo nga dekada nga ginpasidunggan bilang Best Director sa Oscars para sa pelikula nga “Ordinary People” sang 1980 nga amo man ang nagdaug bilang Best Picture.
Nakit-an man siya bilang Alexander Pierce sa mga pelikula nga “Avengers: Endgame” kag “Captain America: The Winter Soldier.”
Si Redford man ang founder sang Sundance Film Festival nga tuigan nga ginapatigayon sa Utah halin pa sang 1978.#
