Ginbuyagyag sang aktres nga si Jada Pinkett Smith nga 2016 pa lang, bulagay na sila sang iya bana nga si Will Smith.
Buot silingon, separado na sila anum ka tuig pa lang antes natabo ang indi malimtan nga pagtampuyong ni Will Smith kay Chris Rock sa stage sang Oscars.
Kun balikan, sang 94th Academy Awards sang Marso 27, 2022, nakibot ang tanan sang nagsaka si Smith sa entablado kag gintampa ang host nga si Chris Rock sang naglahog ini kaangot sa buhok ni Jada.
Nahibaluan nga nagsuprer si Jada sang alopecia rason nga wala na ini sang buhok.
Apang sang sini lang, ginbuyagyag ni Jada nga 2016 pa lang, nagseparar na sila sang aktor kag may tagsa-tagsa na ka kabuhi.
Suno kay Jada, abi niya skit lamang ang pagtampa ni Will sa komedyante, apang sang nahibaluan niya nga matuod ang hitabo, wala siya gihapon nakahibalo kun ngaa naakig si Will.
Nahibaluan nga may duha ka anak ang Hollywood power couple nga amo sanday Jaden kag Willow.
