Ginpaguwa na sang Vatican ang official online calendar para sa 2025 Roman Catholic Holy Year.
Lakip sa masobra 100 ka events nga ginhanda amo ang aktibidad nga iga-organisar sang LGBT Catholics nga ginalantaw isa ka daku kag indi kinaandan nga pagbukas sang Simbahan Katoliko sa gay community.
Ini amo ang pilgrimage sang Italian group nga “La Tenda di Gionata” ukon Jonathan’s Tent nga naka-schedule sa Septyembre.
Ang grupo nga ini nagalaragway sang ila kaugalingon nga may tuyo nga ma-promote ang pag-abi-abi sa LGBT people sa Simbahan.
Sa Jubilee, ginalauman nga magapatigayon sila sang prayer vigil sa local parish sa Roma antes magbyahe sa St. Peter’s Basilica.
Nahibaluan nga ang Roma amo ang global center sang Catholic Holy Year nga magabukas sa Dec. 24, Christmas Eve, kag magalawig tubtub sa Jan. 6, 2026.
Ang Jubilee kaangay sini ang nagakatabo sang isa ka bes lamang sa kada 25 ka tuig. Ginabanta nga masobra 32 million ka mga turista nga magaabot sa Roma para lamang sa mga aktibidad sa sini nga espesyal nga tuig.
Ang Catholic pilgrims nga nagakadto sa Roma sa kada Jubilee ang nagaagi sa ginatawag nga special “Holy Doors” nga pagabuksan sa St. Peter’s kag sa tatlo ka iban pa nga mga basilica sa Roma.
Nahibaluan nga antes sini nga tikang, kilala na si Pope Francis sa pagpanguna sa Catholic Church nga mas mangin bukas sa LGBT community paagi sa pagpahanugot sa mga pari nga mag-bless sa same-sex couples sa case-by-case basis.
