ILOILO CITY – Ginpaggwa sang state-run Home Development Mutual Fund (Pag-IBIG Fund) ang record-setting nga P24.2B sa home loans sa una nga quarter sang tuig.
Ang balor sang home loans ang gin-release sang Pag-IBIG Fund sa una nga period ang mas mataas sa 16% nga P20.94 billion nga ginpaggwa sang amo man nga period sang nagligad nga tuig.
Suno kay Housing Secretary Eduardo del Rosario nga amo ang nagapamuno sa 11 ka myembro sang Pag-IBIG Fund Board of Trustees, iya ginpahayag nga ang pagtaas sang home loan releases ang nagapakita gid lamang nga madamo nga mga mamumugon ang nabuligan sang ahensya agud nga makakuha sang ila kaugalingon nga balay.
Ang padayon nga pagsaka sang home loan disbursements ang makabulig man sa pag-boost sang ekonomiya sang pungsod kag nagabulig nga makabangon ang mga myembro kag subong man ang pungsod nagikan sa pandemya.
Suno sa Housing chief, ang balor sang home loans nga ginpagwa sa una nga tatlo ka bulan ang nakabulig sa 22,210 nga myembro nga makapanag-iya sang balay.
Ini ang nagsaka sang 7% kun ipa-anggid sa 20,712 nga myembro nga nabuligan sang nagligad nga tuig.
Sa amo nga amount, P1.78 billion ang gin-release para sa socialized home loans nga nakabulig sa 4,114 Pag-IBIG Fund members nga na-belong sa minimum-wage kag low-income sectors.
Suno naman kay Pag-IBIG CEO Acmad Rizaldy Moti, ang performance sang ahensya sang una nga tatlo ka bulan sang tuig ang nagasunod sa record-high achievement sang 2021 sang nalapawan ang P100 billion sa home loan releases.
