Naghilibion si Miss Universe 2023 Sheynnis Palacios kadungan sang motorcade nga gin-preparar sa iya tour diri sa Pilipinas — isa ka parada nga daw nangin homecoming parade para sa iya, bagay nga wala sini na-eksperyensyahan sa iya kaugalingon nga pungsod.
Gintinguhaan sini nga makontrol ang luha samtang ginasinggitan sang mga Pinoy ang iya pangalan kag ang pangalan sang iya pungsod nga Nicaragua.
Bitbit kag ginahakos sang beauty queen ang Nicaraguan flag samtang nagaparada.
Si Sheynnis, 23, nga nagdaog sa El Salvador sang nagligad nga tuig amo ang labing-una nga Nicaraguan nga nakakuha sang Miss Universe title.
Mainit ini nga gin-abi-abi sang mga tawo sa iya pungsod sa Central America kag una man nga ginpanginbulahan sang Nicaraguan regime apang sang ulihi amat-amat nga naglas-ay sang nahibaluan nga isa siya sa nangin kabahin sang 2018 protests.
Ang amo nga protesta sang 2018 ang nagtuyo nga pahalinon si President Daniel Ortega nga amo ang naghimo sa Nicaragua nga isa ka authoritarian state sa iya latest stint bilang president.
Tatlo ka bulan ang amo nga protesta kun sa diin 320 ang napatay.
Mangin ang outfit ni Sheynnis sa Miss Universe ang may yara sang white dress kag blue cape nga reference man sa ila nga national flag nga gin-ban matapos ang 2018.
Kasunod man sang pagdaog ni Sheynnis, gin-ban sa ila pungsod ang ila nga national director sa Miss Universe Nicaragua bangud nga suno sa reports, ang entourage ni Sheynnis ang ginasuspetsahan nga simbolo sang pagpamatok sa gobyerno.
Bangud sang amo nga hitabo, wala man sang natabo nga homecoming activities para sa beauty queen kag tubtub lamang sa hypothetical image kag imahinasyon ang nahimo sang Nicaraguan beauty pageant fans bilang selebrasyon sa iya kadalag-an.#
