CAPIZ – Madamu sang pagpanghangat ang pagtudlo sa pampubliko nga eskwelahan.
Sa interview sang Bombo Radyo kay Farah Grace Jimena-Helican, isa ka high school teacher sa Cuartero, Capiz, iya ginpahayag nga sa iya 12 ka tuig nga pagtudlo, madamu siya sang mga pagpanghangkat nga naagyan ilabi na sa pagtudlo kag pagpahangop sa iya mga estudyante.
Suno kay Helican, walo siya ka tuig nga nagtudlo sa isa ka private school sa syudad sang Iloilo bag-o nagsaylo sa pampubliko nga eskwelahan sang nakapamana siya kag nagpuyo na sa Capiz.
Ginpahayag ni Helican nga wala sang kinalain sa paminatasan sang mga estudyante sa pribado kag pampubliko nga eskwelahan apang may yara gid sang kinalain kun estado sang pagpangabuhi ang pagahambalan.
Halimbawa suno sa iya amo nga sa mga pampubliko nga eskwelahan, indi malikawan nga may yara sang pigado nga mga estudyante nga indi makasarang magbakal sang school supplies, uniform, sapatos kag kun kaisa, wala sang balon nga kwarta ukon wala sang balon nga sud-an.
Bilang isa ka manunudlo kag nagaserbe nga iloy sang mga estudyante, ginpahayag sang natungdan nga indi niya mabatas nga indi magbuya sang kaugalingon nga kwarta para nga makabulig.
Sa pihak sini, ginpahayag man ni Helican nga balewala ang tanan nga kabudlay sa tion nga iya makita nga nagmadinalag-on sa ginpili nga karera sa kabuhi ang iya mga anay estudyante.
Samtang, tuhoy naman sa ginaduso nga “No Homework Policy”, ginpahayag ni Helican nga indi siya pabor sa nasambit nga hagna.
Suno kay Helican, mas madamu sang problema sa pungsod nga dapat aktuhan sang gobyerno sa baylo nga pahilabtan ang tuhoy sa paghatag sang assignment ukon homework sa mga estudyante.
Nagapati si Helican nga ang homework ang nagabulig sa pag-angkon sang disiplina kag nagabulig man sa pag-angkon sang maayo nga study habit sang estudyante.
Ginpahayag man ni Helican nga wala nagatapos sa sulod sang classroom ang katungdanan sang mga estudyante kasubong man sa mga manunudlo nga pagkatapos sang walo ka oras nga klase, kinahanglan nila nga tapuson ang lesson plan kag iban pa nga paper works bilang pagpanghanda sa masunod nga adlaw.
