Bukas si Senator Risa Hontiveros nga mangin standard bearer sang oposisyon sa 2028 presidential elections.
Sabat ini sang senadora sang ginpamangkot kun ginakonsiderar bala niya ang pagpadalagan sa pagka-presidente tatlo ka tuig halin subong.
Pahayag ni Risa, wala siya nagapangindi, kag kun amo sini ang hingyuon sang iya kaupdanan sa oposisyon ukon independent bloc, bukas siya sa tanan nga posibilidad alang-alang para sa mga Pilipino kag sa iya kaupdanan.
“I am not saying no, I am open to all possibilities and that’s what I have been asking my fellow members in the opposition or independent bloc: to be open to all possibilities for the sake of the opposition as well as the masses,” pahayag sang senadora kadungan sang Kapihan sa Senado forum, Mayo 21.
Sa pagtakop sang 2025 elections, ginpahayag man sang senadora nga indi ang 2028 elections ang iya ginatutukan, kundi ang pag-isa sa mga kaalyado nga nagasuporta sa Akbayan kag amo man kanday senators-elect Francis Pangilinan kag Bam Aquino sa masunod nga siyam ka bulan.
Pananglitan madayon si Risa sa pagpadalagan sa pagka-presidente sa 2028, ginalantaw nga makasumpong sini si Vice President Sara Duterte nga apisar wala pa sang opisyal nga kumpirmasyon, apang may mga clue na nga ginahatag kaangot sa iya pagpadalagan.
