Ginpa-athag ni Senadora Risa Hontiveros nga ginakabig niya gihapon nga mga kaalyado sa Senado sanday Senador Bam Aquino kag Kiko Pangilinan bisan pa man nga yara na ini sila sa majority bloc.
Suno kay Hontiveros, luyag niya nga mapabakod ang hanay sang oposisyon sa Senado, upod sanday Aquino kag Pangilinan. Apang ginpahayag man niya nga magkaisa gihapon sila bilang mga kasangga, upod ang pila ka mga kongresista sa Kamara.
Bilang isa ka miyembro sang minority bloc, ginpahayag ni Hontiveros nga prayoridad niya ang pagpabakod sang oposisyon sa guwa sang Senado. Ginpasiguro man niya nga may pareho gihapon sila nga panindugan ni Aquino kag Pangilinan sa pila ka importante nga isyu.
Ginpunto pa ni Hontiveros nga sanday Pangilinan kag Aquino ang naglagda sang joint resolution sang minority bloc nga naga-panawagan nga abrihan sa publiko ang tanan nga deliberasyon sang bicameral conference committee may kaangtanan sa pambansang budget.
Una na niya ginpahayag nga proud siya nga magapabilin bilang miyembro sang minority bloc sa idalum sang liderato ni Senate Minority Leader Vicente Sotto. “At peace” man siya nga liwat nga mangin kabahin sang minorya, subong nga magaserbi siya bilang Deputy Minority Leader sa ika-20 nga Kongreso, ka-upod si Senador Juan Miguel Zubiri.
Sa katapusan, ginpahayag ni Hontiveros nga mabinungahon ang ila una nga meeting, kag buo ang ila determinasyon nga mangin fiscalizer kag magserbi bilang check and balance sa Senado.
