Ginpasar sang Senado sa third and final reading ang hagna nga nagatuyo nga maghatag sang Filipino citizenship sa Chinese national nga si Li Duan Wang ukon kilala man nga si Mark Ong apisar pa nga ginaalegar nga may kaangtanan man ini sa Philippine offshore gaming operators (Pogos).
Sa plenary session, Enero 28, nakakuha ang hagna sang 19 affirmative votes, isa nga negative, kag zero abstention.
Ang isahanon nga nagpamatok diri amo si Senate Deputy Minority Leader Risa Hontiveros nga nagpaathag nga indi masarangan sang iya konsensya nga paboran ang pag-grant sang Filipino citizenship kay Wang.
Antes sini, nag-apelar ang senadora sa iya kaupdanan nga ibasura ang hagna bangud ginpahayag sini nga “junket operator” si Wang sang Nine Dynasty Casino nga isa sa pinakadaku nga Pogo actors na nabuyagyag sang hearings nga ginpatigayon anay sang Senate panel on women. Suno sa Senadora, sang nag-apply si Wang para sa naturalization, wala sini ginsugid nga junket operator siya sang Nine Dynasty.
Para kay Hontiveros, makaalarma ini, bangud suno sa iya, kun legal ang junket, indi man ini kinahanglan nga taguon sa publiko.
Dugang diri, ginaalegar nga may kaangtanan man ini kay Duanren Wu nga amo ang “big boss” sang gin-raid nga POGO hub sa Porac, Pampanga.
Magluwas diri, ginbuyagyag man ni Senator Hontiveros nga may yara si Wang sang madamo nga taxpayer identification numbers nga nagalapas sa polisa sang Pilipinas.
Ginpahayag man ni Hontiveros nga makaalarma man ang affiliation ni Wang sa Philippine Jinjiang Yu Shi Association nga ginapatihan nga related sa united front sang Communist Party of China.
Gin-athag sang senadora nga wala siya nagasiling nga guilty si Wang, apang may ‘red flags’ na siya nga nakit-an kag bastante ini para sa iya agud nga indi paghatagan sang Filipino citizenship ang amo nga Chinese national.
Dugang sini, kuntani nakatuon na ang mga Pilipino sa natabo kay dismissed Bamban, Tarlac Mayor Alice Guo nga sang ulihi nabalahuba nga isa gali ka Chinese national nga si Guo Hua Ping.
“Hindi pa ba tayo natuto sa panloloko ni Guo Hua Ping, alias Alice Guo, o kay Yang Jianxin, alias Tony Yang? Hindi pa ba tayo nadala sa mga abusadong dayuhang nagpanggap na Pilipino para pagkakitaan ang taumbayan at dungisan ang ating mga sistema?” kabahin sang pahayag sini sa plenaryo.
“Susugal pa ba tayo muli sa isang taong ikinubli sa Kongreso ang kanyang mga kaduda-dudang kaugnayan?” dugang sini kasunod sang binotohay. “Hindi ko po hinatulan na guiilty sa anumang krimen si Li Duan Wang… pero sapat ang mga red flag na ito para hindi siya pagkalooban ng pagiging Pilipino nang ganito lamang kadali.”#
