Nagpanawagan si Senator Risa Hontiveros sa otoridad nga pasabton man ang mga nagpato-pato sang istorya kag nag-akusar kay anay Senador Leila de Lima nga nangin rason kun ngaa napreso ini sa sulod sang pito ka tuig.
Ginpaguwa ini nga statement matapos nga gin-grant sang korte sa Muntinlupa City ang demurrer to evidence nga gin-file sang kampo ni De Lima nga nagakahulugan man nga epektibo nga na-dismiss na ang ikatatlo kag katapusan nga kaso sa iligal nga droga nga na-file batok sa iya.
Suno kay Hontiveros, indi lamang reputasyon ni De Lima ang nahigkuan kundi mangin ang integridad sang legal system sa pungsod bangud sa mga sala nga akusasyon.
“[W]e need to focus our attention on those who have wrongly accused her. False charges compromise not only the accused’s reputation but also the integrity of our legal system,” pahayag sini.
“We call upon the authorities to pursue and hold accountable those who have perpetuated these unfounded allegations. Justice must be served, and those who have wronged her and our legal system must face the consequences of their actions,” dugang sang senadora.
Wala ini sang ginmensyonar nga pangalan apang kun madumduman, si anay President Rodrigo Duterte ang sulit-sulit nga nag-akusar kay De Lima nga may kahilabtanan sa iligal nga droga.
Ang Department of Justice nga ginapangunahan anay ni former Secretary Vitaliano Aguirre II amo ang nagpasaka sang tatlo ka separado nga kaso batok kay De Lima bangud gin-alegar nga may partisipasyon ini sa illegal drug trade sa sulod sang New Bilibid Prison (NBP).
Para naman kay Hontiveros, ang pagbasura sa katapusan nga kaso batok kay De Lima ang isa ka pamatuod nga naka-base ang hustisya sa kamatuoran kag hustisya kag indi sa mga pamulitika kag akusasyon nga wala man sang basehan.
“She has faced public ridicule and injustices, yet she remained steadfast in her commitment to truth and justice. Noon pa man, alam kong walang sala si Sen. Leila at umaapaw ang kaligayahan sa puso ko na ngayon ay nakamit na niya ang hustisya. From ‘Free Leila Now’ to ‘Now, Leila is free,'” dugang sang senadora.
Mangin si House Deputy Minority Leader kag ACT Teachers party-list Representative France Castro ang nagpanawagan man para sa accountability bangud suno sa iya, isa ka sahi sang “political persecution” ang ginhimo sa anay senadora.
“This decision exposes the fabricated nature of the charges and the abuse of the justice system for political ends. We must not forget that Senator De Lima lost almost seven years of her life to these baseless accusations. The officials who orchestrated this injustice must be held accountable,” suno kay Castro. “Justice for the other victims of the Duterte drug war should also be fast-tracked, considering that they have also been waiting for years, especially for those who were extrajudicially killed by the police,” dugang sini.
Sang Enero, matandaan nga ginpahayag ni De Lima nga ginakonsiderar sini ang pag-file man sang kaso batok kay Duterte kag Aguirre bangud sa ila dug allegations.
Matandaan nga Nobyembre 2023 sang gintugutan siya nga makapyansa matapos gin-detain sa Camp Crame halin sang Pebrero 2017.
