ILOILO – Indi mapalagyuhan sang mga akusado ang kaso paagi sa hospital arrest.
Ini ang may kaangtanan sa kaso nga ginakaulamiran nanday Janiuay, Iloilo Mayor-elect Frankie Locsin kag retired Police Col. Agustine Molina sang Manuela Subdivision, Maasin, Iloilo.
Sa interview sang Bombo Radyo kay Atty. Noel Palomado, isa sa mga Bombo Abogado, iya ginpahayag nga ang hospital arrest ang mahimo lamang nga pahanugutan sang korte kun yara sa alang-alang ang kabuhi sang arestado ukon akusado.
Sa bahin ni Mayor Locsin nga may yara sang standing warrant of arrest, ginpahayag ni Atty. Palomado nga katungdanan sang arresting authority nga dal-on sa Sandiganbayan ang anay alkalde matapos dakpon.
Katungdanan naman sang kampo ni Locsin nga magpasaka sang request para sa hosiptal arrest kun may yara sang balati-an ang anay alkalde kag ang nasambit nga request ang pagadesisyunan pa sang korte santo sa ginpasa nga pamatuod.
Kun tagumatayon naman ang arestado, mahimo ini ang dal-on gilayon sa ospital agud nga madapatan sang pagbulong bag-o presuhon.
Nahibalu-an nga gindala sa The Medical City Iloilo ang anay alkalde bangud sa pagpalanakit sang dughan kag pneumonia matapos gindakop kadungan sang iya nga paggawad sang NBI clearance sang damlag lang.
Samtang, sa bahin naman ni Retired Police Col. Molina nga nagpangdukol sa isa ka traffic investigator sang Lapaz Police Station, ginpahayag ni Atty. Palomado nga wala pa man napasakaan sang kaso apang makabig man sa gihapon nga arrested person ang retired police colonel.
Bag-o mapaguwa sa presuhan ang isa ka arestado suno kay Atty. Palomado, kinahanglan nga may yara sang court order.
Nahibalu-an nga si Molina ang na-hospital arrest bangud sa pagsakit ang tiyan matapos ginpreso.
