Nalakip ang pinuno sang pinakadaku nga ospital sa Gaza sa ginhilway sang Israel matapos ang masobra pito ka bulan nga detention.
Suno sa Israeli authorities, si Al-Shifa hospital director Mohammed Abu Salmiya kag dinosena nga iban pa nga Palestinians ang ginpaguwa kag ginbalik sa Gaza para madapatan sang nagakaigu nga pagbulong.
Sa panaysayon naman ni Abu Salmiya, ginsiling sini nga siya kag ang iban pa nga mga preso ang naka-eksperyensya sang “severe torture” sa mga presuhan sa Israel matapos sila nga gin-detain kasunod sang Oktubre 7 nga pagpang-atake sang Hamas militants.
Suno pa kay Abum Salmiya nga nabalian pa sang tudlo sang nakabalik sa Gaza Strip, pila sa mga preso ang nagkalamatay na lang sa interrogation centers samtang ang iban naman ang wala ginhatagan sang pagkaon kag bulong.
Sa sulod sang duha ka bulan suno sa iya, tunga lang gid nga tinapay ang ginahatag sa kada preso kada adlaw.
Nakaagi man sila sang ginatawag nga “physical and psychological humiliation.”
Matandaan nga una na ginsiling sang Shin Bet intelligence agency nga nagpasugot ang Israeli military ang hilwayon ang iban nga preso para nga mahawanan kag makahatag sang ligwa sa detention centers. Ginpahayab sang ahensya nga nagapamatok ini sa pagpaguwa sang mga terorista nga kabahin sa mga nag-atake sa Israeli civilians gani ang ila ginhilway amo lamang ang Gaza detainees nga may “lesser danger.”
Nahibaluan nga si Abu Salmiya ang lakip sa gin-detain sang pwersa-militar sang Israel kadungan sang raid sa Al-Shifa.
Gina-akusahan sang militar ang Hamas nga naggamit sang mga ospital sa Gaza Strip bilang palanaguan para sa ila operasyon. Ini ang rason kun ngaa ila gin-raid ang mga ospital sa Gaza lakip ang Al-Shifa kun sa diin nakit-an ang ginaalegar nga mga tunnel kag iban pa nga imprastraktura sang Hamas.
