Ikaw bala ang tawo nga mahilig sa adventure?

Kun sa imo pagdumdom nakadto-an mo na tanan nga mga hotel, dira ka nagsala bangud may yara sang hotel nga ginakabig pinakadelikado sa bilog nga kalibutan.

Ngaa ayhan?

Kun masarangan mo magtinir sa isa ka hotel nga yara nahamtang sa tunga sang dagat, masami gina-igo sang bagyo, kag ginapalibutan sang bagis… Bisitaha ang Frying Pan Tower nga yara malapit sa North Carolina.

Kinahanglan mo lang magsakay sa sakayang pandagat apang medjo malawig lang ang byahe kag ang isa ka option mo amo ang pagsakay sa helicopter padulong sa Frying Pan Tower.

Ang ini nga adventure ang para sa mga tawo nga wala ginakakulbaan.

Ang Frying Pan Tower ang sadto anay light station sang U.S Coast Guard.

Gin-auction ang amo mo nga light house kag nabakal ini ni Richard Neal sang 2010 sa balor nga $85,000 ukon masobra P4 million.

Suno kay Neal, mabudlay man ang iya inagyan antes matigayon ang iya nga plano nga himuon hotel ang light house apang sa subong makonsidera na niya ini bilang 1-Star hotel.

Madamo sang mga aktibidad nga pwede mo himuon samtang nagatinir ikaw sa nasambit nga hotel.

May yara sang unicycle, try mo man ang slackline, skeet shooting gamit ang biodegradable clays, snorkeling, high dive, pagsakay sa jet-ski ukon mag chill-chill lang.

Kun luyag mo naman nga mag surf sa internet, aba indi magkabalaka bangud apisar yara ini sa tunga sang dagat, mabaskog kag madasig ang ila internet connection.

Diri mapamatud-an nga indi mo kinahanglan nga mag tinir sa 5-star hotel agud nga mag enjoy.