MANILA – Lusot na sa third and final reading sa Kamara ang House Bill no. 7727 ukon ang General Appropriations Bill para sa fiscal year 2021.
Ini ang ginkumpirma sa Bombo Radyo ni Iloilo 1st District Rep. Janette Garin.
Sa budget deliberation subong nga gab-i, naghatag sang Turno en Contra speech si Garin nga nagaserbe nga Senior Deputy Minority Leader.
Sa interview sang Bombo Radyo kay Garin, iya ginpahayag nga ang paghatag niya sang Turno en Contra speech amo nga isa-isahon ang mga ahensya sang gobyerno nga may maayo kag pigado nga performance lakip na diri ang pagtumod kun paano tungaon ang national budget.
Suno kay Garin, may yara sang unused approriations ukon pondo nga wala magasto sang 2019 nga nagalab-ot sa P321 billion nga extended tubtub sa 2020 kun sa diin ang iban ang gingamit sa COVID-19 response.
Ginpahayag ni Garin nga gin-ako mismo sang Department of Budget and Management nga as of June 30,2020, naglab-ot sa P1.9 trillion ang unused approriations nga tuman ka taas sa P77 billion nga una nga gindeklarar sang ahensya.
Ginpamangkot man sang mamalidha kun nga-a kinahanglan pa nga magpangutang ang gobyerno kag kun sa diin ginagamit ang loan kag kun nga-a tuman ka damo nga infrastructure projects ang ginkansela.
Bangud sa nasambit nga development sa Kamara, ginpahayag sang natungdan nga “on the right track” ang pagpasar sang P4.5 trillion national budget kag ginalauman nga sa masunod nga bulan, matigayon na ang bicameral conference meeting.
