Ginakondenar sang Deputy Majority Leader sa House of Representatives ang ginhimo nga pagbunggo sang Chinese ship sa Filipino vessel nga nagapatigayon sang rotation kag resupply mission sa Ayungin Shoal.
Sa nasambit nga insidente, pito ang pilason sa diin isa gid ka myembro sang Philippine Navy ang nautdan sang tudlo.
Sa interview sang Bombo Radyo kay Iloilo 3rd district Rep. Lorenz Defensor, Deputy Majority Leader sa Kamara, iya ginpahayag nga dapat manindugan ang Pilipinas kag ipakigbato ang kinamatarong sa West Philippine Sea.
Apang kay Defensor, nagakadapat nga himuon ini sa malinong nga paagi kag indi pinaagi sa gyera.
Importante suno sa mamalidha nga ipaintindi sa China nga respetuhon ang 2016 international tribunal ruling sa diin nasaad nga ang West Philippine Sea ang sakop sang teritoryo sang Pilipinas.
Nagalaom man ini nga mas dakuon sang Kongreso ang pondo para sa development sang Armed Forces of the Philippines kag Philippine Coast Guard nga amo ang nagapangapin sa teritoryo sang pungsod.
