ILOILO CITY – Ginkakas na sang House of Representatives sanday former President kag Pampanga 2nd District Rep. Gloria Macapagal-Arroyo kag Davao City 3rd District Representative Isidro Ungab bilang deputy speakers.
Ini ang natabo matapos gin-aprubahan sang House plenary ang motion ni House Deputy Majority Leader kag Cagayan 1st District Rep. Ramon Nolasco Jr.
Sanday Arroyo kag Ungab ang gin-islan nanday Isabela 1st District Representative Tonypet Albano kag Lanao del Sur 2nd District Representative Yasser Alonto Balindong.
Ang pagkakas kanday Arroyo kag Ungab ang natabo isa ka adlaw matapos nagpasalig si House Speaker kag Leyte 1st district Rep. Ferdinand Martin Romualdez nga ang away kontra sa nagapakalain sa Kamara kag ang pagtumod ni Senior Deputy Speaker kag Pampanga 3rd District Rep. Aurelio ”Dong” Gonzales Jr. kay anay President Rodrigo Duterte nga amo ang nagapakalain sa Kamara kag nagtawag diri nga pinakagaruk nga institusyon.
Ang kritisismo ni Duterte ang ginsundan sang desisyon sang House nga kakson ang confidential funds ni Vice President Sara Duterte sa national budget sa masunod nga tuig.
Gin-adoptar man sang House ang House Resolution 1414 nga naga-uphold sang integridad kag dungog sang chamber kag nagapabutyag sang pag-apresyar, pag-isa kag pagsuporta sa liderato ni Romualdez.
Suno naman kay Ungab, ginabaton niya ang iya kapalaran nga wala sang anuman nga kalain sang buot.
Nagpasalig man ini nga magapabilin ang iya suporta sa Marcos administration.
Si Arroyo nga yara sa gwa sang pungsod ang wala pa nakahatag sang iya statement may kaangtanan sa nasambit nga butang.
Sanday Arroyo kag Ungab ang kilala nga kaalyado sang mga Duterte.
