House panel, gindeklarar nga ‘sufficient in grounds’ ang mga impeachment complaints vs VP Sara

Gindeklarar sang House Committee on Justice nga “sufficient in grounds” ukon may bastante nga basehan ang duha ka impeachment complaints batok kay Vice President Sara Duterte.

Nagakahulugan ini nga mahatagan na sang ligwa ang pag-umpisa sang hearing sa masunod nga semana.

Suno sa House panel, indi direkta nga ginsabat ni VP Sara ang mga alegasyon batok sa iya sa iya nga ”Answer Ad Cautelam,” nga gin-file bilang sabat sa mga reklamo.

Ang duha ka impeachment complaints ang nagaunod sang mga akusasyon sa Bise Presidente kaangay sang betrayal of public trust, culpable violation of the Constitution, kag iban pa.

Kaangot ini sa ginaalegar sala nga paggamit sang P612.5 million confidential funds kag pagpamahog sa kabuhi ni Presidente Ferdinand Marcos Jr. kag iya nga pamilya.

Suno kay House Deputy Minority Leader Leila de Lima, nga ang nangin sabat sang Bise Presidente ang wala nagasabat sa mga alegasyon.

Suno kay de Lima, wala man sang paathag si Duterte tuhoy sa malversation sang pondo, anomalous disbursements, ukon sa mga envelopes nga ginpanghatag sa pila ka opisyal sang Department of Education.

Bangud diri, mahimo na nga mapadayon sang komite ang impeachment hearing proper, kun sa diin talakayon kag busision ang mga ebidensya kag testimonya sang pareho nga complainants kag ni VP Sara.

Bag-o ang botohay, una na nga gin-athag ni House justice panel chair kag Batangas Second District Rep. Gerville Luistro, nga mabug-at ang mga alegasyon kag nagakinahanglan sang konkreto nga sabat.

Dugang pa niya nga magasugod ang pormal nga hearing sa Marso 25, 2026.

Samtang, gin-aprubahan sang House of Representatives ang resolusyon nga magatugot sa komite nga padayunon ang impeachment hearings bisan yara sila sa recess.

Nasaad nga masuspinde ang mga sesyon sang Kamara kag Senado sa Marso 21 tubtob Mayo 3, 2026.