Handa na ang House prosecution panel sa pagbukas sang impeachment trial subong nga adlaw batok kay Vice President Sara Duterte sa Senado.
Suno kay House spokesperson kag Lanao del Sur Representative Zia Alonto Adiong, 100% na nga handa ang 11 ka myembro sang prosecution team matapos ang pila ka bulan nga paghanda.
Sa una nga adlaw maga-focus ang House prosecution panel sa pagpresentar sang mga ebidensya, pagsunod sa due process, kag pagpahanugot sa Impeachment Court nga magdesisyon base sa layi kag sa mga kamatuoran.
Nahibaluan nga lakip sa mga akusasyon batok kay Duterte ang ginapahayag nga wala nagakaigo nga paggamit sini sang P612.5 milyon nga confidential funds, paglapas sa Konstitusyon, gina-alegar nga pagpamahog sa kabuhi sang Presidente kag sa pamilya sini, mga iregularidad sa procurement sang Department of Education, kag nagasobra nga manggad sini.
Ginpahayag man sang prosecution panel nga ipresentar nila ang ila mga ebidensya, lakip ang video sang ginapahayag pagpamahog batok sa Presidente kag iban pa nga mga dokumento kadungan sa pormal nga pagbukas sang impeachment trial.
