Nagapati ang House prosecution team nga indi dapat magpahilabot ang Korte Suprema sa impeachment trial batok kay Vice President Sara Duterte.
Ini ang kasunod sang pag-file sang petition sa Korte Suprema sang mga abogado halin sa Mindanao agud pauntaton ang impeachment proceedings batok kay Duterte.
Ini ang ginpangunahan ni Atty. Israelito Torreon, legal counsel ni Pastor Apollo Quiboloy kag anay Land Transportation Franchising and Regulatory Board (LTFRB) Chairman Atty. Martin Delgra III.
Magluwas sa ila, nagpirma man sa petisyon sanday Atty. James Reserva kag Atty. Hillary Olga Reserva kag iban pa nga mga abogado halin sa Davao kag mga suppporters ni Duterte.
Sa interview sang Bombo Radyo kay House Deputy Majority Leader Iloilo 3rd District Representative Lorenz Defensor, iya ginpahayag nga indi maapektuhan ang preparasyon sang 11-man prosecution team sang Kamara
para sa impeachment trial batok kay Duterte sa pihak sang gin-file nga petisyon sa Korte Suprema.
Suno kay Defensor nga isa sa prosecutors, legal ang impeachment process kag sakop ini sang constitutional bounds.
Ginpahayag sini nga ang impeachment batok sa bise presidente ang dapat nga desisyunan sang publiko kag sang Kongreso.
Ginpahayag man ni Defensor nga 100 sila nga kumpyansa sila sa validity sang proseso.
Ginpanindugan naman sini nga ang impeachment ang isa ka congressional function, kadungan sang pag-welcome sa judicial review.
